𝐁𝐚𝐰𝐢𝐡𝐭𝐞𝐢 𝐚 𝐝𝐚𝐦 𝐭𝐡𝐞𝐢 𝐥𝐨 😩

 

      "Bawihte, ka dinhmun hi a chau tial tial a. Eng chena rei nge ka biak theih dâwn che a, eng hunah nge biak theih loha ka awm dâwn tih a hriat tawh loh.

      Chuvangin, ka theih lai hi chuan biak reng che ka duh a. Ka pa leh ka unau, ka ṭhian ṭhate pawh ka biak peih tawh loh laiin, nangmah chauh ka rawn be hram hram ṭhin.

      Chutih laia nangin ngaihsak loh hmel deuha min biak hian, ka rilru a nâ tlat zel a ni" tiin, a natna avanga lei tawt tih hriat takin min bia a. Inthiam lohnain ka khat a, ka lung a chhe ta ngawih ngawih a!

      "Bawihte, min kalsan thei lo. Ka thei lo, i natna hi bei let rawh aw" ka han ti a.

      "Theihtawpin ka bei let alawm bawihte. Ka thawk feih feih chhûng chu. Chuti maiin he natna hi inhnehtir ka tum lo" tiin min han thlamuan let hlauh a! Hmeichhe duhawm ber a va ni chiang tak em!

      Khuanu ruat rengin kan intawng ka ti lo thei lo. Tichuan, November thla tawp lamah Bangalore-ah zuk kalin, hma lam hun kan thlir dun reng laiin natna khirh zet maiin a rawn man ta a nih kha.

      Khata chin tun thlengin damdawi in a la chhuahsan ta miah lo! Bangalore aṭangin Super Specialist damdawi in, Delhi lamah an phur chho a. Mahse, hma lam pan aiin hniam lam a pan zel si. 

      "Bawihte, ei tur ka siamsak châk tawh che e. Ka bula i awm hunah chuan maw, thil tui ber ber hlir i ei tawh ang. Tunah tak hi chuan min rawn hruai chhuak daih la, ramhnuai reh riaina hmunah min hruai daih la ka ti e.

      Ih ih ih, fa kan neih hunah chuan i duat sual dâwn tih ka hre mai. Kei chu ka strik si a, in pafain min ning thei ngawt ang. Mi harh i ni si a, zingah i tho hma thei si, ka peih miah lova nia. 

      Khuma awma in cuddle mai mai ka duh. I thawh hma pawhin mahnia exer i lak ka phal dâwn miah lova nia. Ka bula mut chu i ning thei ngawt ang, i mut a chhuak hma thei si. Kei lah mut ka harsat si a.

      Ka khan che ang a, ka kuah reng zel ang che. Ka che sek zel bawk sia, a chângin i mut a chhuah zual lai takin ka smooch ang che a, min mutsan ka phal ngai dâwn miah si lo a. Ka ti harh lui zel ang che.

       Bawihte, ka lo thi a nih chuan ngaihzawng nei leh ang che. Kei chu min theihnghilh daih tum ang che. Ka thlan pawh lo tlawh sek lo la, lo chei miah suh ang che. Mahse, ka thlarauin englai pawhin i kiangah awmin, ka thlir reng ṭhin ang che"

     Kum tam tak lo inzui tawh ang mai kan ni a. Engkim kan inhrilh tawn a, sawi dun loh kan nei tawh lo a ni ber. Kan inhau ve fo a, kan inti thiam lo ve fo bawk. Mahse, kan inhau hi chu kan inbiak leh hian a hma zawng aiin kan inngaiin kan inthlahlel ta ṭhin.

      Bawihtei nen hian kan inkawmngeih em em a. A dam ṭhat phawt chuan englai pawhin kan inbia a ni ber. Ni khata darkar 20 dáwn inbiak ṭumte kan nei a. Darkar 10 hi chu ngei ngeiin kan inbe ziah ṭhin.

     Zan mut a harsat vangin, a theih hram chuan ka be reng zel a. Mahse, dar khat bawr velah chuan ka mut a chhuak tawh ṭhin si. Amah chauha zankhuaa a han tlaivar tur ka ngaihtuah hian, ka kalsan hreh em em zel a.

      Dar 2 aṭanga dar 5 inkâr, amah chauha ka han thlahthlam ngai ṭhin hi, hreawm ka tih ber lai a ni. Mahse, ka taksain a tlin bik si lo. Ni hnih dan velah hi chuan ka awi mu thei mai a. Mahse, a mu pawh ka veng reng ṭhin.

      A chhan pawh a nâ ti hi a rum chhuakin, a rawn ṭap chhuak ṭhin a. Harh si lo hian a nâ tuar thawm ka ngaithla a, "Bawihte, dam dam" tia lo ṭawng bak tih theih ka nei si lo. A hreawm ngat ngat thei teh asin! 

     "Ruahmanna ka siam hnemin, hmabakah tih tur ka ngah em em. Mahse, chung ka ruahman lâwknaah chuan nang hi i tel ve hauh lo. Ruahman lâwk ni si lova ka nuna thil thleng duhawm ber chu!"