Tisa tawh phawt, Lei leh Vana thilsiam zawng zawng zingah i mawi ber ti em chuan ka chhal ngam hauh lo che! Nimahsela, nang ka hriatchhuah apiang che hian khawvel hi mawi thar ta riau hian ka hre leh thin a, ka ngaihtuah apiang che hian leilung hi duhawm thar ta riaua hriatna ka nei ziah thin. Ka hmelma, ka huat ngawih ngawihte lam hian an chungah rilru ringawt na na na chuan ka nem diai diai thei hial thin zuk nia!
I hmel ka hmuh a, ka ngaihtuahna thinlung pheka i hmaifang a rawn inlar apiangte hian tunhmaa nula hmeltha ka tih em em thinte hmelthatna chu hmuhnawm ka ti lo zovin ka mitmengah mawina an nei lo ta riaua hriatna ka nei thar leh thin a! Ka bula fiamthu emaw ka lawmzawng tak sawia ka beng hriata thusawi hriattur awm hauh si lote hian, i mize duhawmna ka ngaihtuah changte hian hlim takin ka lo nui leh ver ver thin a, ka eng hi a thawl thar ta riau thin! Keini ang misual tan chuan hetiang hun hi Siamtu Pathian kan hnaih hunlai berte pawh a ni thei hial ta ve ang a!
Inngaihzawnna khawvel, Beiseina khawvel ni bawkah hian beisei ngam hauh lo khawpa tleitir duhawm, hmeltha, mahse zahawm ru tlat cho loh leng an awm ngai a nia! I hmuh tir phat atanga i thinlunga hmangaihna kui tiah a awm, a chawm lenna atana tui pek tur i chawi ngam si loh, amah i hmuh apianga i thinlunga zung kaih nghet zual zel siin hnunglamsabarh ang maia a duhthu a hrilh che tluka thu thinthawng, thu lawmawm chungchuang a awm thei ngai lovang!
Chu mitkhapkar, hun phe zeuh, dumde mei det chhung lek chuan i hringnun khawvel chu lehlin thawkin a awm ta nghal a! Mihring nihna sual ber, Thlemna avanga tlukna chu i sualna bul ni tawh lovin amah i hmangaihna chu i nihna sual berah a lo chang ta nghal a. Chu mihring duhawm lutuk chu tawng hauh lo pawh ni la, ngaihawm veng veng hian i ring nghal a, amah i hmangaihna chu leili hausaknaa khum rual loh, mita hmuh tinrengte aia mawi chungchuang, zalenna ai pawh a hlu, nunna hnar boruak aia thianghlim a ni a lo ni ta!
Zing thawh a nuam a, eirawngbawl a tui thar ta riau a; thenawmte thawm bengchheng i tih lamin thawm rimawiah an chang ta niin i hre thei hial a, i naupang thar ta thut niin i inhre ta hial nia! Amah chu a hmuin tawk dawn lo mah la, i samkhuih dan i uluk thar ta sawt a, i kawr zehluh lamin pawr mawi lo a awm i hlau ta hial nia! I khaber hmul tladah takte chenin mawi takin i khuih mam a, i kawngkalte reng reng pawh i pheikhai lam a zang ta vah a lo ni! I tuk fuh tum phei chuan Pathianin heti ema mihring min hmangaihna ril lutukte hi hriatthiampui ve lek lekin zuk han inhre thei hial che a maw le!
I mitthlaa nula dang zungzam thlalak i nemkai chiai chuaite chu uina leh inthlahrunna nei hauh lovin kumkhua atan i nawtreh nghal a, i thaw a veng zui nghal ta vawng vawng bawk a. FB khawvelah i han zuanglut a, tu hriatthiam hauh lo tur, mipakhat chiahin a hriatthiam turin thu i han post a, nidanga i thu post comment tu an tam em em thinzia leh like tu i ngah em em thinlaia i lawmna leh hlimna aiin like pakhat chiah i han hmuh chuan i hlimna leh lawmnate chu van tawng hialin an mawi thei zuk nia!
I han ngaihtuah chiang thin a, mak i ti vawng vawng chu a ni si a maw? I ngaihtuahnaah chumi ngei chu a rawn luh tam poh leh Thal romei zam chiai ang maiin ngaihawm i ti vawng vawng a, Thlasik kawl eng sen paw riai ang maiin i lung a ti leng ngawih ngawih thei a ni. Nipui sat vanglai a Siktui luangti her her ang maiin duhawm i ti vawng vawng a, To ruahsur tawpa Chhimbal zam chiai ang maiin hmuhnawm i ti ngawih ngawih thei hial nia!
Eng chena rei nge a lakah hmangaihna vangin at ka so ang tiin i inzawt a. Phur takin nangmah vekin chhang nghalin, Chhung Si-arte enna a dak hma loh zawng chu tiin duhthawh em emin i chhang nghal a! Eng chena rei nge ka mamawh ang che ni tiin i han zawt a. Sik leh sa ten hunbi thlak danglama an nungchang an hlauh hma zawng chu tiin tan i khawh nghal a!
Eng chena rei nge i thinlungah i thinlai ang maia ka cham ang ti a i duhthawh em emna chu, Tuifinriata tui zawng zawngte Tiau phova an inbun zawh hun hunah tiin i han duhthawh zui sak a!
Eng chena sei nge ka duhna che thui zawng chu ni ang tiin hun hriat lawk hauh lo chu i cho ta hial a, I thinlungin khaw dang reng hawi lova mi duh chhung zawng leh I nunna thahrui a chhah a, i thlarauin hmun ruat lam a pan thleng ngei chuan tiin tu pawisawi mah i hlau ta lo thei a lo ni!
No comments:
Post a Comment