𝐎𝐮𝐫 𝐋𝐨𝐯𝐞 𝐒𝐭𝐨𝐫𝐲 - 𝐈𝐈

(𝑾𝒉𝒚 𝑴𝒂𝒓𝒆𝒎𝒂 𝒍𝒐𝒗𝒆𝒔 𝑹𝒅-𝒊)

       Eng vanga va hmangaih ta em em nge a nih? Eng vangin nge a duh tak em em chhan? Mi nupui a ni a, fa a nei tawh bawk. Chuti chungin ani tlangval hnahkhat hian eng vangin nge a va hmangaih tlat si? He zawhna hi vawi tam a inzawt ṭhin a, chhanna hrang hrang a dap kual ngial ṭhin.

       Beiseinain a ni a va hmangaih ni. Beiseina awm a awm loh pawhin, a beisei ru tlat a. Beidawnnain an dinhmun dik tak hmuhtirin, beidawntir tum mah se a beidawng duh tlat lo. A chhan pawh, a pasal nena an khawsak dan a hria a. Mi nupui duhlai va ngaizawnsakah a inngai thei lova ni. 

      A tirah a va hmangaih nghalin, sap thu fing tawiin, 'Love at first sight' a tih hmangin chu hmeichhia chu a va hmangaih nghal mai em ni? Ni lo e, chu hmeichhia chu a vawi khat hmuhnaah a va hmangaih nghal hauh lo. Chu hmeichhia chu lehkhabu kâwm nalh tak, a chhûng thu erawh chhiar zet loh chuan eng lam hawi thawnthu nge inziak tih hriat hauh loh a ni zawk.

      Chu lehkhabu kâwm nalh tak, mit la tak chuan amah chu a hip hmasa ngei alawm, a pha thei hauh lo. Mahse, lehkhabu phek tin a han keuin a han chhiar ta a. Lehkhabu phek a keu tam tial tial a, a chhûng thu ngaihnawm a ti tulh tulh a. A tawpah chuan chung lehkhaziala chu hmeichhe hringnun thawnthu chu, tuma dan rual lohin a va nganain a va duh ta em em a ni zawk si a.

       Chung lehkha phekahte chuan, hringnuna thil thleng duhawm leh mawi ber berte a va chhiar a ni hauh lo. A châng chuan lehkha pheka chanchin nemkaia awmte chu, a ngaihnawm lohin a lungchhiatthlak em em a. A thimin a nu burh a, lem a harin chhiar a hreawm ngawih ngawih ṭhin. A châng leh thaw a ipik churh a, mang a ang a. Lehkhabu chawp chuan thûla khunga, theihnghilh vang vang a châkawm châng pawh a awm alawm. 

       Chutiang thawnthu tehnuaih chhiar tur chuan a lo inbeisei hauh lo a. Inrin lâwkna pawh a nei a ni bik lo. Heng thute chhiara hre fiah thiam nghal tur te, pawmzam thei tur leh a chaw tui ber ni nghal turin amahah eng theihna mah a awm nghal bik bawk hek lo. Chu thawnthu neitu hringnun hnawkhnâi tak chinfelna thurûk pawh, amahah a awm chuang azeng a ni bawk hek lo. 

      Mahse, kum tamin hringnun tawnhriat hrang hrang, kawi tin mil a lo temtir tawhte avang zawkin, chu lehkhabu chu tlanchhiatsan nghal vat lo a ni zawk. Hriat thiamna thûk tak nei turin amah ngeiin, hreawmna leh harsatna nasa tak, nat vawng vawngna leh thim hnuaia mittui tlak zawih zawihna nen lam a lo tem fiah tawh a ni zawk. Chu nun aṭang chuan amah ang mi, a tawn ang lo tawng ve tawhtute hriat thiamna a nei a ni zawk si a.

      Mahse, chu lehkha pheka thu inziakte chu thu mawi lo leh ngaihnawm hlira khat an ni vek bik lo. Lehkha pheka thawnthu neitu nun duhawm tak tak, ngaihawm em em, lung tilêng vawng vawng, hlimawm leh nuihzatthlak tak tak, ngaihzawn awm hliah hliahte chuan, a hringnun pang khing thim tuih maite chu an hliahkhuh hneh em em a ni zawk si a. 

        Chu hmeichhe hmel ṭhatna chuan mipa mit a lain, a hip vawng vawng ngei mai! A pawn lam lan dan duhawmna leh hmel ṭhatna chu, a chhûngril mawina leh duhawmna, tlawmna leh thianghlimna, ngilneihna leh thahrui chakna, thinlung nêm leh pawisawi hlawl lo te chuan an thuam mawi tulh tulh zawk tih a hmu tam tulh tulh a. A chhungril nun a keu chhuak tam tulh tulh a, a ngaina tial tial a. Lang lo lama a mawina leh duhawmna thurûk a chhiar tam tulh tulh a, a ngaizawng nghet tial tial a. 

      A silfen atâna rinawmna kawrfual a ngainat dan, a hmui chei nâna lainatna hmuihnawih a hman ṭhan dan, a sam chei nâna thinghlimma diar a hman rimna, a kawnghren atâna ngilneihna a hren ṭhinna, vawthlep atâna chakna thahrui a hman rimnate chuan, zawi zawiin amah hmangaihna thinlung a neih thûktir tial tial a ni zawk. 

       A famkim lohna, a nun felhlelhna zawng zawngte chu, a nun duhawmna leh ngainatawmna te chuan an hliahkhuh zo hneh em em a. A nun kham suar ang chim tawh ai chuan, pangang ang maia a nihna zawng zawng buhchium ni tura zial zo vek a, phengphehlep mawi ber ang maia a rawn insiam danglamna chu, eng hunah pawh, engtik lai pawha a duh zawk, ngainat zawk leh hmangaih zawk atân a thlang ta lo thei lo a ni!

      Chutah zet chuan a mitah chu hmeichhia aia hmel ṭha leh duhawm zawk hmeichhe dang an awm thei tawh lo. Chu hmeichhia aia hringnun hmanpui a châk zawk an awm leh thei tawh bawk hek lo. A zing tho hlim lawr fap aṭanga, model ang maia nalha a incheina thlengin a mitah chuan hmuhnawm ber a ni zel tawh zawk a. A fel lohna leh famkim lohna rawn inlâr châng pawhin, chung a duhawmna leh hmel ṭhatna zawk chu a thlirin a thlang nawn leh ṭhin zawk a lo ni.

      Chu hmeichhia nen chuan thangvana ghlapui leh arsi ang maiin an inmilin an mawi dun a ti a. Ruah phingphisiau leh chhimbal ang maiin an inchawih tawn a ti bawk. Lui luang kianga thing phun leh, kumtluana rah duh tak ang maiin an inmil a. Chu lehkhabu chu a chaw tui ber, nitina a chhiar nin theih ngai loh, phek tin a chhiar nawn tluk tlukah a lo chang ta a nih hi.

       Chu hmeichhia chuan hmangaihna awmze dik tak a la hmel hriat hauh lo tih a hria a. Hmangaihna avanga atsona pawh a nunin a la tem chhin ngai lo tih a hria. Hmangaihna avanga nun hlimna, hmangaihna avanga hringnun mawina thurûk pawh a la tem ngai lo tih a hre tlat. Hmangaihna avanga naupang chhe nun, engkim mai hlimawmna, duhawmna leh mawina la awm ṭhin chu temtir a châk a.

       Hmangaihna bân tha chakzia, inhumhimna khulhbing sâng nih a tlinzia, manganna ruama innghahna hrualhrui rintlak a nihzia, khawharna laka hnemtu duhawm a nihna, lunglênna khawvel duhawm tak hruttirtu a nihna, beidawnna khur thûk taka beiseina siamtu duhawm a nihna hre ngai lo tur atân, chu Pathian kutchhuak thil siam mawi ber chu a awm a phal ngang lova ni!

       Hmangaihna a hmel hriat chhun chu phatsantu tenawm, innghahna tlak hlek loh, ṭahna mittui sûrtirtu, beidawnna khuarkhuruma chentirtu, rinawmna reng nei lo, mihring mize chhe lai zawng zawng chawk nungtu, a nun pawt hniama rap hrualtu mai a ni si a. A hmangaihna hriat chhun chu a hmêl a mawi hlawl lo a. Duhawmna reng a nei ngai lova nih kha.

      Chuvang tak chuan, chu hmeichhia chu hmangaihna mak, mawi leh duhawm a hmelhriattir châk tlat tawh a. Hmangaihna avanga atsona nunah liluhpui a duh a. Hmangaihna avanga naupang chhiatna nun tempui a duhin, hmangaihna avanga lunglên khawvel duhawm em em hruattir a châk ta a nih hi. 

       Chu hmeichhia chuan amah hmangaihtu, mipa fel lo ve tak, hmel ṭhat bikna leh thiam bik nei hran lo, hringnuna hausakna leh mi lenna chhuan tur reng nei lo chu, sirah hnawl lo se a duh em em a. A fel lohna ang angin lo pawm ve se a duh ngawih ngawih bawk. A phu loh em avangin hmusit bik mai lo se a ti a. A thinlung takin hmangaih let ve se a ti ngawih ngawih a nih hi.

      Hei hi a ni, Leitlangpui tlangval Marema'n, Zawlkhawpui lanute zinga duhawm leh hmel ṭha ber, rual tin khûma, tleitir tuai duhawm ber ai pawha tuai duhawm zawk, model pian nalh an tih zawng zawngte ai pawha pian nalh zawk, a hmeichhiatpuite lakah mi dum pa hnâra lunghlu bengbeh ang maia langsar mualpho, Ramdinmawii a hmangaih tak dan thawnthu chu lo ni!