𝐊𝐚 𝐅𝐢𝐫𝐬𝐭 𝐋𝐨𝐯𝐞 𝐚𝐥𝐚𝐰𝐦 𝐢 𝐧𝐢𝐡 !

 

     Kâr khat zet Bawihtei chanchin ka hre ta lo. ICU lamah awmin, thihna nen an inbuan thial thial si a. Hetiang taka hun harsa leh hreawm hi, ka pian ahnu lamah ka la tawng ngai lo.

     Ka lunglêng awmngaihna hre lo ka ván ruai a. Bawihtei nena kan sulhnu chhui kirin, Bawihtei ka ngaih a zual êm êm. Bawihtei chungchang ka sawi hian, mite hian ka fak uchuak an ti ang tih ka hlau ṭhin.

     Mahse, hmeichhia ka hriat tawhah chuan ani ang reng renga hmeichhe changkang, inngaitlawm si, inuluk, ngeiawm hlek si loh, lehkha thiam leh thil hre zau, taima leh mi khawngaihna ngah ka la tawng ngai lo.

      Eng ang pawhin han dam lovin, a nâ chhuak reng ṭhin mah se, zingah a inbual ngei ngei a. Damdawi in khum puan hi, anmahni ta hmangin ni khat danah a thlaktir ziah a. Khum chuarah a mu ngai lo a, englai pawhin a taksa a tuaihnumin, dam lo hmel a pu ngai lo.

      Smart takin a inchei thlap ang a, phawsawlh takin a awm ngai lo a ni tawp! Eng subj pawh ka sawipui thei deuh zel a, hriat loh a neih erawh naupangin a pa a zawt chik ang maiin, a hriat loh apiang mi zawt melh melh ṭhin.

      Bawihtei vun hi nausen vun ang maiin a mamin, a no êm êm a. Amah hi a rimtui veng veng reng a, inchei a thiam em em bawk. Ngaizawngtu a ngahzia hi mak ka ti thei hle a. Mahse, amah ka hre chiang tulh tulh a. Mipain an ngaizawng zel hi a lo mak hauh lo.

      Kan han inngaizawng chho ta kha, a mizia leh nungchang avangin ka duh tulh tulh a. Chutih laiin kei ve mai mi duh let ang tih, ka thinlung hian a ring ngam ngai lo. Mahse, hei leh chen he khawvela hun a lo hman liam a, mipa changkang leh hausa tak takin an bem mawlh mawlh laiin, a hmangaih hmasak ber, 'Ka hmangaih che' a tih hmasak ber mipa ka lo ni reng si a!

      Kha mi nia ka hlimzia, ka lawmzia kha thu maia sawi chhuah thiam mi pawh a ni lo. Hnunglama sa barh dik tak a ni. Mipa hmangaih la nei ngai ta lo chu, a thinlung zawng zawngin mi hmangaih a, a thikthu pawh a chhe ngei mai!

      Engkimah min dah pawimawh hmasa thiamin, mi zah der thiam êm êm a. Mi a ngaihlu thiamin, mi duat lah a thiam! A pangchang êm êm a, mi hmangaiha ka tâna a inpêk thûk ang zelin, ka laka a beisei pawh a sâng reng a. 

      Inneih hial kan sawi kai chhovin, dam lo reng pawh ni se, Zoram a lo chuankai huna inneih kan tum ta kha a nia. Mahse, a sawi lâwk ang ngeiin, tunah erawh biak theih lohin natna khumah nâ tuarin a awm ta mek si a nih hi.