𝐀 𝐧𝐚𝐭𝐧𝐚 𝐤𝐚𝐧 𝐡𝐫𝐢𝐚𝐭 𝐭𝐢𝐫𝐡 𝐜𝐡𝐮𝐚𝐧...

     "Bawihte, nizana kan inbiak zawh hnu lâwk (zing dar 2 hnu velah) khân ka hnâr a thi chiam a. A râpthlak tawp a ni mai, thi khar a rawn baw chhuak hawk hawk mai a ni" tih thu chuan, zualko thu hmanhmawh ang maiin mi deng nghing lawih a!

      Bangalore lam aṭanga a unaute an lo kal chuan, rang takin an chiu mu nghal a. Damdawi in ṭha berah hruai nghalin, kan inbiak leh theih meuh chuan, a natna hming min rawn hrilh ta a. Eng natna nge a nih a hriat loh thu, daktawr a zawh duh loh thu leh, keimah zawkin eng natna nge tih lo hre turin min ti ta a.

      Chu a natna, natnain a kentel ka han hre zet chu! Luipui luang lai an chawl ṭhuapin, arsite'n ênna an hloh nghalin, khawvel pawh a ding nghal chawt ni berin ka hria! Mahse, intipachang takin a natna chu natna vâng tak ni mah se, tihdam har a nih loh thu leh, enkawlna ṭha a dawng anga a dam vat tur thu bakah, a natna avanga a taksaa natna lo thleng thei zawng zawngte chu, dam thei ang berin ka hrilh ta a.

     Tichuan, a natna nen an han inbuan chho ta tak tak a nih kha! Mi â nileng a nih bik loh avangin, engkim a hre chhawm ve zel si a. Vawi tam sawi tur hre lova, hreawm ti êm êma awm tlawk tlawk ni a va thleng zing êm! 

      Vawi khat phei chu ka insum zo ta ngang lo. Ka ṭap chhuak ta hial a! Chutia dan rual loha ka mittui a tlak tak zawih zawihah chuan, ka lungchhiatna chuan paukhauhna nun a pe ta hlauh zawk a. Duat taka mi hnem pahin, "Bawihte, lungngai suh. Ka dam dâwn alawm, I chhûngte inhmuhtir suh aw, a zahthlak. Ka dam dâwn, ṭap tawh suh le" min ti ta a nih kha!
    

        Ni, hmeichhe duhawm leh ka mitah chuan hmel ṭha ber, huaisen leh tawrhchhel ber a va ni chiang êm! Chutih laia a rilru ka han ti nâ ṭhinte hi, ka fel tâwk lohzia, ka tlin tâwk lohzia leh amah ka phu lohzia lo lanna a ni ṭhin. Inthiam lohna leh pawi tihnain ka khat a, hreawm tihna a thuahhnih ṭhin. 
    

       A pang a dam ik hi chuan, hlim tak leh phur taka min be thei rengte hi a mak ka ti êm êm a. Tlema ka han nawmsam loh deuha, ka thin chhiatzia leh mi ka dawhtheih lohzia ka han inhmuhte hian, Bawihtei ang mihring ka tawng vannei ka intihna hian, rual a khûm tak meuh meuh ṭhin.