𝐀 𝐭𝐡𝐢𝐥 𝐦𝐢𝐧 𝐩𝐡𝐮𝐭 𝐜𝐡𝐮 𝐚 𝐤𝐡𝐢𝐫𝐡 𝐥𝐮𝐭𝐮𝐤 !

     "Ka thihsan hnuah che chuan..." tia min biak ṭan lai chuan, rang takin ka lo pawt chat a.

     "Chutiang thu sawi suh. Min thihsan dâwn hlei nem. I dam ngei dâwn alawm bawihte" ka tih zawng ngawt pawhin, ka hnuk a ulh a. Ka ṭah a chhuak ngawih ngawih mai a ni.

       "Bawihte, min ngaithla rawh. I mizia ka hre chiang a, mi sual i ni lo. Mahse, nangmah maia i awm tur hi ka ngaihtuah lutuk che. Chuvangin, nangmah hmangaihtu che nupuiah nei ngei ang che. 

       Ani chuan nun kawng dikah a hruai ang che. Ani chuan ka tihpui theih loh che tihpui chein, hlim takin a siam dâwn che alawm. Dam ṭhata nang nena thil tam tak tih dun ka châk em em. Mahse, ka dinhmun hian ṭhat lam a pan dâwn tawh lo..." a tih phei chuan, awmngaihna reng ka hre tawh lo.

      Rang takin a thu sawi kalhin, "Bawihte, chutiang sawi tawh suh. Engtin nge hmeichhe dang ka hmangaih theih ang? He khawvelah nangmah ang hi pakhat chauh an awm a. Tu pawh lo tawng ila, nang nen ka khaikhin zel tawh dâwn a. Tu mah ka duh thei tawh lo ang" ka ti ta a.

       A ngawi vang vang a, "Damdawi in aṭang hian min la chhuak daih la ka ti e. Ramhnuai reh takah min hruai la, chutah chuan in mal ding lo awm se. Chutah chuan kan pahnih chauha chen dun ka châk" a ti ta a.

      Ka âwmah chuan min hnawhtu a awm a, ka hrawkah chuan min rektu an awm emaw tih mai tur niin, ka ṭawng chhuak mai thei tawh lo. Bawihtei nena kan intawn chhoh dan, kan inhmangaihna zinkawng leh a nat chhoh dan ka ngaihtuah ṭhin a. Thawnthu phuah thiam takin, a duh ang thála tragic comedy lemchan a phuah a ang ka ti ṭhin!

       "Kan chanchin hi i la ziak dâwn nia aw" min tihte kha ka thinlungin a vawng reng a. Mahse, ka ziakfung hian a tawp a khar phal lo a, a ziak thiam dâwn hian ka hre lova ni. Thil engkim kan tawng dun a, kan pahnih ang taka inpawh leh inngaina, inning ngai lo kawpchawi an awm bik hi ka ring lo.

      A chhûngte tu mah a biak peih loh pawhin, a khua a sik loha a taksa a na lutuk lo a nih phawt chuan, min be reng peih a. Mahse, kan in biak chhûngin nachhawkna vawi tam eiin, a inchiu ṭhin a ni si. 

       Englai mahin bawihtei hi dam lo angin, a hmêl a pawrin a inchei duhdah ngai lo. Nitin amaha a inbual theih loh pawhin, a ni (aunt) in a bual fai ziah a. A hmai cheisakin, en mai chuan dam lo nâ tak a ni tih a hriat ngai loh.

      Mahse, a hnârah oxygen dâwt an vuah reng a. Min biak rei deuha a thaw hah ṭhinte chu ka hai ngai lo. Min hmangaih êm avangin, ka lakah a pangchang êm êm a. Rilru nat nân a hman phah fo. 

     Kei lah mi pawlawh leh ngaihsam ru zet mai ka ni si. Ka nun hi ka haw ngawih ngawih a, tling lo ka inti êm êm reng a ni. A lakah ka pangchang ruin, a mi duatna ka thlahlel ve tlat bawk si nen, nun thiam har ka tihzia hi ka sawi thiam lo a ni.

      A dam lo zawkin min ngaihsakin, min duat êm êm reng a. Chuti chungin a rilru ka lo hliam leh ṭhinte hi, a hnuah pawi tiin ka inchhir ngawih ngawih ṭhin. Mahse, kan inhauh apiangin a hnu lâwkah chuan, a hma zawng aia inthlahlel leh inngai tawnin kan inkawm leh ṭhin a nih hi.

      "A nih leh ka thihsan che chuan engtin nge i awm ang?" tih zawhna chuan chhanna a ngiat tlat a. Pehhelna kawng reng a awm tak si lovah chuan, "Bawihte, ka awm dan tur ka hre thiam bik lo. Ka ṭap nasa hle ang a, i ruang kil ngei ka duh ang. Mahse, miin min hriat dâwn loh avangin, ka inthlahrung hle ang" ka han ti a.

      "Kawng engkima nangmah lo buaipui turin, ka ṭhian ṭha ber pahnih ka be fel vek tawh. Ka thi tih an hriat rual rualin, kawng engkimah an lo buaipui nghal vek ang che.  Han sawi chhunzawm zel teh" min ti ta mai a! Ka hamhaih lutuk chu, ka ngawi reng mai.

      Ka hnîm sulh a, ka âw a lãwi zo a. Ka thaw hráwih a, lungchhe tak chungin, "Engtia rei nge ka sûn dâwn che ka hre lo. Nitin zan tin hun hmang dun reng kan ni a. Chuvangin, ka khua a har ngawih ngawih dâwn a ni. Kan inbiaknate ka ngaithla let ṭhin ang a. I thlanah pangpâr ka lo dah ṭhin ang" bah nuaihin ka ti ta a!