𝐔𝐧𝐭𝐢𝐥𝐥 𝐰𝐞 𝐦𝐞𝐞𝐭 𝐚𝐠𝐚𝐢𝐧, 𝐟𝐚𝐫𝐞 𝐭𝐡𝐞𝐞 𝐰𝐞𝐥𝐥 !

       Kâr hnih chhûng lai mai, a mipa zawk biak theih lohin a awm ve ta thung a. Rammu turin, mipa chuan natna khuma awm a hmangaih a kalsan a lo ṭul ve ta thung a ni.

       Chu zet chu a harsa ta ngei mai. Kâr hnih chhûng zet, chanchin engmah inhrilh tawn theih lo tura a hmangaih ber kalsan turin, mipa chu a chak tâwk bik lo. Mahse, a kal bo zawka a intuaihriam chu an pahniha mamawh niin a hre si.

      Chu hmeichhe hmêl ṭha leh duhawm ber, natna hrikpui meuh pawhin a hmêl mawina leh duhawmna an ker chhiatsak theih loh chuan, thei leh thei lovin a hmangaih ram mu turin a mamawh tur nia a hriatte chu, uluk takin a rawn hrilh thlap a.

      A in ken kim loh hlau takin, engkim a ngaihtuahpui ta zawk hlauh a! Natna khuma awm zawk chuan, hlimna nui ri nen a mipa chu a thlah ta zawk asin! Tichuan, kâr hnih chhûngin hmeichhia chuan a natna tuar lovin, a mipa hmangaih chu kam khat pawha mangṭha thei lovin mual a liamsan thut thei tih hre dun reng chungin an inṭhen ta a.

      Chatuan tluk zeta rei kâr hnih a liam hnuin, rintlak Pathian chuan veng dunin an intawn leh a phalsak reng a lo ni! An inngaihzia chu Shakespeare-a'n a Sonnet kal tlanga a Dark Lady a ngaihzia a tarlang ang te, John Keats-a'n Fanny Brawne-i a thlakhlehzia, Napoleon-a'n Josephine-i tel lova a nun khawharzia an puang angin, lehkhapuanah tarlang dun ve thiam lo mah se, anni aiin an inngaih tawnna leh inthlakhlelhna chu a nep bik lul lo!

      Pathian chuan an thlarau nun a tihdam dunsak an mamawh tih hre rengin, van ram nawm chhan ber tur hmangaihna chu an chen dun a lo la phalsak reng a lo ni a. A hma zawng aia inngai leh inthlahlel tawn turin, an han inhmangaih thar leh ta zet chu, van meuh pawhin thlir a châk ve hian ka ring si a!

      Mahse, nunrawnna khawvela cheng an nihna lo lang nghal zatin, rei pawh an inthlakhlelh dun hman hmain, hmeichhia chu endikna pindan thim reh ruih leh, khawharthlak takah nawr luh a ngai nghal zat a. Hmeichhia chuan chu endikna piandan chhûng luh hreawm a tihzia, a ngainat theih ngai lohzia sawi niap niapin, a tawpah erawh he thu mawi tak hi a rawn chham chhuak ta!

      "Ka lo chhuah ve leh, inhmangaih tawna induat tawn turin i hnen ka rawn pan nghal ang. Min lo nghak reng ang che aw..." tiin, huaisen takin chu pindan khawharthlak berah chuan a innawr luhtir ta a!