𝐁𝐚𝐰𝐢𝐡𝐭𝐞𝐢 𝐤𝐚 𝐚𝐰𝐢 𝐦𝐮 ṭ𝐡𝐢𝐧 𝐚 😔

 

     Bawihtei hi a dam loh hma pawhin, zan mut harsat chi a ni a. Insomnia a neih avangin, zanah a mu mang ngai lo. Mahse, mak deuh maiin ka âw a ngaihthlak hian, a muhil thei ṭhin tih ka hre ta a.

      Tichuan, a han dam lo chho ta kha a taksa nâ nen, mut a harsat zual deuh deuh a. Zan khat tlaivar hlek pawha ngaihtuahna a nut burh duhzia kan hre vek ang. Ani erawh a zawnin zan tam a han mu lo ta ṭhin si.

      Ka ngaihtuah thei êm êm mai a. Mahse, a zan zawn erawhin awih mut a theih loh tih ka hria. Tichuan, zan hnih thum danah ka han awi ta ṭhin a. Titi nuam a tiin, a ṭawng siam siam hi ngaihthlak nuam ka ti thei hle a.

     Zan dar 7 te, dar 9 aṭangtein ka'n bia a. Zing lam dar 1 aṭanga dar 2 vel thlenga ka'n ṭawngṭir hian, a lo chau ve deuh ta a. "Bawihte, mut tum tawh rawh le. Thawnthu ka hrilh ang che, lo ngaithlain mut i tum dâwn nia aw" ka ti ta a. "Aw le" tiin, thu hi a va awih ṭhin tak êm aw!

     Rei ka be hman lo, ka awi mu thuai thei ṭhin. Mahse, a han muhil ta cheng a, a taksa nâ lutuk vangin thawm a chhuah ta reng ṭhin. A chângin nâ tih vangin a rawn rum chhuak a, a tal nasa ṭhin.

     A muhil thawm hi ngaihthlak a nuam mawlh lo. Mahse, mut a mamawh si. A rum ṭiah ṭiah reng ang a, a chângin a nghik feih feih a. A châng leh a rawn ṭap chhuak hawk hawk ang. Mahse, a harh loh avangin a lawmawm ka ti tho tho a.

      Ka men theih chhûng ka lo veng ṭhin a. A rawn ṭe chhuah apiangin, "Bawihte, dam dam..." tih pahin ka ṭawngṭai mawlh mawlh a. Amah be reng chungin Pathian ka au a. "Lalpa, khawngaih takin hahdamtir rawh. A nâ chhawkin mut hahdamtir rawh" tiin Bawihtei ka be mawlh mawlh ṭhin.  

     Mahse, mihring ve mai ka ni si. A thawm ngaithla reng chung hian, ka lo muhil leh nge nge ṭhin a. Ka inthiam lo thei êm êm a ni. Ka nu kha ka buaipui hman miah lovin a boral a. Bawihtei hi chu, ka theihna zawng zawnga buaipui hi, ka tum a ni tawp. 

     "Buaipui ka hreawmin, hrisel a ngai si a. Nang chu i hrisel lo ve tho si a, min buaipui reng thei lo ang. Engtikah nge ka khua a rawn sik dâwn a, buaipui ka ngaih dâwn tih hriat lâwk theih a ni si lo.

     Hetia min ngaihsak hi a hlu êm êm a. Hei bak bak a awm thei chuang lo" tiin, duh anga ka buaipui theih loh vanga ka inthiam loh chângte hian, lawmthu sawi pahin min fuih ṭhin. 

     Aw, ka hmangaihnaah hian a damna han awm teh reng se aw. Amah ka duhnaah hian, a taksa damna awm ni se, a han dam dâwn tawh teh reng nen!

April 1, 2025