𝐓𝐡𝐚𝐢𝐤𝐚𝐰𝐢 𝐁𝐚𝐰𝐧𝐠 𝐓𝐞 !

 

        Ṭhatna leh ngilneihna te'n dam chhûngin i ṭang bel rawh se. Tun ṭum chu ka zia ka thlak a, online love letter ka han thawn hluai che a, lo hre thiam nang che aw.

         Ka thaikawi bawngte ka rawn tir e, Thâmral lova in rûn a rawn thlen chuanin;
Bawihte, nemte'n lo bawih biak ang che aw.

       I chi leh kuangte angin mi lo dawngsawng la, ka fel lohnate leh chhiatna erawh ka laichinteah ngai lo hram ang che.

      I hlimthla ka thlir apianga ka mit hmuhnate'n ka rilru an dawi nia ka hriat reng lai hian, i hlimthla tluka dawithiam duhawm an awm ka ring hauh lo.

            Nang ka hmangaihna che puanchhuah thuah hian, hringnuna ka thatchhiat tluk zetin ka taima tih hre ta la, mi dem ang em?

          Nang zawng, itsikna paw'n a thik ngam loh khawpa  rilru ṭha i nih kha ti raw, Darling?

Mipate duhna hi hmeichhiate'n mipa in duhna lakah chuan a thothang a thatho zawkin, a zauthau hma bik a. A nghet lovin khuarei a daih lo chawk reng a ni!

Nimahsela, keiin nang ka hmangaihna che chu a dan a dang ta bik a!

Mipa dangte hmangaihna hmachhuan hi chu rawpna mai, phur thutna hmanga thu mawi leh inchawih lo taka puanchhuah an ni ṭhin.

Ngei an nei thuai a, kham chin an nei sam em em ṭhin a, dam chhûng atân rinrawla hman tum chu, thli thawt laia buhsi tualleng ang maia hmangaihna thla nei; thlawh bo hmang ang lek a ni si!

         Ka thinlung nghawr nghing ṭhintu nang ka hmangaihna che erawh, hmeichhe nâk nêm dawl zawh mi rual a ni lo tih hre fiah thiam tak ang che maw?

         Tuifinriat ang maiin a huamhap a, pai tâwk reng a nei lo. Kham chin a nei lo va, puar tâwk a hmu ngai hek lo. 

          Dawhtheihna lim an sawi ang mai a ni a, lungchhiatna châng reng hre lo ang mai a ni e.

           Ka laitual lenna hmuna ka mit latu deuh ka han tihte hi i hmaifang ang pu, sakruang nei mi an lo ni leh ṭhin a! Anni ai chuan ka Darling-i bawk hi ka thlang nawn leh ziah ṭhin.

I zûnzâm hian min phuar vel chiai e,
Zing ṭian berhva di chhai lenbuang zâr mawi tawnin;
Mahriakin lunglên ka tuar thiam lo!

Yrs...

P.s Khuanu'n duhawmna a sem leh hunah chuan hahchawlh thiamna pe hlauh che rawh se. Chuti lo zawng, a hringhranin vanramah lak chhoh che an tum palh hlauh ang e.