𝐀 𝐃𝐢𝐬𝐭𝐚𝐧𝐭 𝐕𝐚𝐥𝐞𝐧𝐭𝐢𝐧𝐞'𝐬 𝐃𝐚𝐲 💙

 

      Khaw chhak aṭanga Inhmangaihte Ni lo her chhuak chu, Siamtu'n leilung a siam tirh lai ang maiin a tharlam a. Inhmangaihte Ni pualin eng nge ka dawn dâwn tih hriat lâwk lohna chuan, chhûngrila timur kai harhin ka nuam veng veng mai. (A hmain French luxury brand, Lacoste bag hlu leh mawi zet mai ka dawng tawh a nih kha)

       Mite angin khaw hmun khatah kan awm lo mai a ni lo. Ka hmangaih ber chu natna khumah, a ke avanga kal thei lovin, a lei nâ leh a hrawk vûng vangin a ṭawng thei lo bawk. "Duhtâwka ṭawng theih ka va châk êm!" tih thuin min den nat dan chu, sawi chhuah mai thiam mi a ni lo. 

      Rilruah chuan thil hrang hrang a lo lang zut zut a. Dam ṭha dunin, khua hmunah lêng ni ila zawng, he Ni duhawm takah hian ka hmangaih ber chu, a theihnghilh ngai tawh lo tur hun danglam bik ka han hmanpui tur! Mahse, a rem mawlh rih si lo.

       Kan dinhmun ka hre thiam a, lungngaia thinrim a sâwt lo tih ka hria. Phur takin inbox ka han hawng ta a. He video tawi fel tak, ril leh hlu êm êm, khuaipui zu aia thlum zawk, an sawi Helen of Troy aia hmel ṭha zawk, Chawngtinleri let sawma duhawm zawk chuan min lo hmuak reng a lo ni!

      Ha Ni-ah hian rual ka awh bik loh nân, harsa chung chungin ka hmangaih chuan phone-in min bia asin! Min be rei thei lovin, a thu sawi pawh a sehchilh nuai mai. Kan inbiak zawh hnuah pawh, text hmangin min la be zui hram hram asin!

      A natna avangin a kut hmawrte an dum zo a. Phone keypad hmeh a harsatzia ka hriatpui bawk. A thu type pawh a hma angin a fel thlip thlep thei tawh lo. A khât mawi tâwkin a hahchawlh zeuh zeuh reng a ngai a. Chuti chungin min tihhlim hram hram tumin, theihtawpin a intipachang a. Tu dang mah kan va ngai bik lo êm!

       Valentine's Day ka hman tawh azawngah, tun kum ang reng renga ni danglam, thinlung khawih, hlu leh chhinchhiahtlak ang hi ka la hmang ngai lo. Mahse, ka hmangaih ber tân tih theih engmah reng ka neih lohzia, eng thilpêk mah ka pêk theih lohzia, ka hmangaih a ni tih lantirna tura engmah ka neih lohzia ka hriat chhuah leh ṭhinna, hriattirna nunrawng berin min velh natzia van Pathian chauh lo chuan, tuma'n min hriat thiampui ngai lo ang.

 
       Engtin nge he hmeichhe duhawm ber, mipate ngaihzawn rawn, a thinlung a hungna tala hawn tuma kei ka ni intite'n, chabi milpui an zawn luih luihna kâra, kei ve mai hi a thinlung min pêk tih ngaihtuahin ka han inen ṭhin a. Itawmna, duhawmna leh min hmangaihna chhan tur keimahah eng thil ropui mah ka hmu zo thlawt lova ni.

      Pathian hnenah inthlahurng tak leh, a mi chhan pawh beisei ngam lo chunga ka nu boral ta ang hmeichhia, a thinlung ang pu mi, a nungchang ang nei mi ka dil vena kha, chhanin ka awm tih hai rual a ni ta lo. Khawvela ka hmeichhe hmangaih hmasak ber, ka fawh hmasak ber, ka ṭang nêma ka kuah hmasa ber, ka len chhuahpui hmasa ber, ka thurûk engkim ka hrilh ṭhin ka nu boral ta thlak nân, Pathianin Bawihtei hi min pe a lo ni reng a! 

      A nuna thil mak (miracle) lo thleng ka ni ngawt lo. Amah ngei hi ka nuna thil mak lo thleng, dam ka thlakhlelh chhan, hma lam pana ke ka pen châk chhan, mi puitling nih min châktirtu, ka hringnun mawina ber, ka nunna hnùkpui ber a lo ni tih, he Inhmangaihte Ni-ah ngei hian hriat fiahtirin ka awm ta a lo ni.

      Chérie, je t'aime de tout mon cœur et je veux passer une éternité avec toi 💙